2024-09-13
明報
【明報專訊】在年初時，有老友話打算買番一個單位自住，好過替人供樓，叫我幫佢留意下有乜「筍盤」，老友又想搵人做「免費勞工」。不過，我話無問題，但我只能夠提供買樓最佳時間，不一定是「筍盤」。
近日我見樓價跌得差不多，市場上不時有一些優質物業出售，於是同老友講，如果銀根鬆動，現在可以買樓，樓價高低是一個問題，但最緊要是可以買到靚樓。老友話他不確認樓市已經見底，俗語話「寧買當頭起，莫買當頭跌」，他寧願等樓價見底之後回升才買，這才不會做錯決定，我心裏想，老友這個決定是絕對錯誤的。
一般商品的確可以寧買當頭起，但樓宇不同，靚樓放盤只會在樓市下跌時才會出現，當樓市回升，那些靚樓盤源便會失蹤，雖然可以用同樣呎價買到樓，但質素就會差很遠，這就是很多人不明白的道理。最後，那些打算買樓的人一部分會買那些不甚優質單位，另一部分人等樓市下一次低潮時才買。
物業投資者都知道，一般人深信寧買當頭起，所以，在樓市上升時會賣走手上質素最差的物業，並且同買家講，樓市仍然會上升，結果是樓市仍然上升，買家當然開心，但是投資者仲開心，因為他們知道，很多人的心態是寧買當頭起，買了樓見樓價仍然上升便以為贏咗。其實，真正贏家是投資者，他們趁樓市上升時賣走手上最差，平時唔係咁容易賣走的物業。
紀惠集團行政總裁
[湯文亮 敢說反話]