2024-09-11
明報
【明報專訊】好多發展商，死抱住大量豪宅，現在沽不出，都不知點算好。其實，發展商要想賣出一間幾億元的豪宅，難過賣出一間上市公司。我親眼見過，十幾年前，一個中型發展商，去sell一個內房老闆買他的其中一間豪宅，日日請食請玩請溝女，sell足一年，先至賣出一間獨立屋。
不過，賣不出也不要緊，皆因樓價可以mark-to-market，升咗值，未賣出都當賺咗錢，仲可以同銀行借錢使住先，但係現時就辛苦了，又要計息，又要還錢，而且也是mark-to-market，貶值要撇帳，相信在未來一年，發展商因樓盤貶值而撇帳，陸續有來。同朋友吃飯吹水，談起此事，朋友說：「不過豪宅的樓價升幅大過普通樓，乜都補返啦。」
「根據理論，升市係先升豪宅，升得快，升幅也有。不過跌市，也是先跌豪宅，跌得快，跌幅也大。」我說：「豪宅的租金回報低，只有1.5厘至2厘，普通樓則有3厘，10年、20年下來，單單係租金的回報相差，已經好襟計。更何况，豪宅單價大，難甩手，連租客都少過普通住宅樓，丟空都係要照計利息成本，死未！」
事實上，現時就是這個困境：豪宅就算劈價，都無人有咁多錢買得起！史上最大鑊是1983年，豪宅呎價居然跌到同太古城看齊，這些陳年歷史，相信沒什麼人記得了。
[周顯 投資二三事]