2024-08-29
明報
【明報專訊】近日樓價下跌，有地產商表明會追差價，雖然有人話地產商無良，但更多人認為買家要尊重合約精神，雖然合約是對地產商有利。簡單來說，如果地產商不能如期交樓，買家最多就是可以攞返訂金或者加少少利息，從未聽過有地產商賠訂，所以話合約精神，只是對甲方有利。
老實說，追差價的地產商又真係唔係咁多，不過，地產商即使決定不追差價，但點都唔敢將條款寫在合約上。其實，唔追差價也是賣點，不少收租業主，如果遇上一個租客擔心未能完成租約，業主會追租追到合約到期，會加上一個條款，就是租客未能完成合約，只要交一個定額罰款，雙方便可以終止合約，這個方法是有效的，不少租客都是因為有這個條款，寧願畀貴少少租。
現在已經有地產商表明不會追差價，如果新樓盤賣得好，相信唔追差價的地產商陸續有嚟，甚至會成為合約條款，如果地產商不提供這個條款，買家就要採用即供分期，千祈唔好採用建築期付款。其實，地產商不追差價亦是合理，雖然話合約精神，但如果地產商交唔到樓，而樓價亦上升不少，地產商會不會賠償差價畀買家？當然是不會，如果不會，點解要追撻訂的差價？嚴格來說，這算是一條不平等合約，既然不平等，仲講乜嘢合約精神。
紀惠集團行政總裁
[湯文亮 敢說反話]