【明報專訊】老友六十大壽，收到幾份由女兒男朋友們所送的厚禮，老友問個女邊個男仔最有機會，他只會收最有機會的男仔厚禮，個女話未決定，個個都有機會，或者個個都無機會。老友聽到之後將禮物退返畀所有送禮的男仔，老友心意我明白，無謂令人誤會，以為老友個女接受送禮男仔的愛，如果老友唔接受厚禮，他日如果不能談婚論嫁，亦不會被人講閒話。不過，老友個女就唔開心，認為父親生日，無幾個男仔送厚禮很無面。
近日市民對銀行不滿，搞到金管局要解畫，call loan就無辦法，抵押品價值下降，銀行是有權call loan追差額，唔call是人情，call是道理，不能妖魔化call loan，大家都明白，但銀行收了客戶按揭申請，又遲遲唔肯批，這有點那個。
如果銀行認為申請人不合格，最好是不接受申請，甚至在客戶未落訂已話唔接受申請，而現在就是銀行接受申請後，問無數咁多問題，又要收入證明，到最後，甚至過了成交期限仍未批，搞到個客要撻訂。銀行方面，一定會講要顧及銀行風險及香港銀行體系安全，對不合格申請人唔批按揭貸款，銀行是無錯；不過，如果唔打算批，應早啲講畀申請人知。
老友擺大壽當日冠蓋雲集，但佢個女唔開心，因她的男朋友們見到老友唔收禮，以為自己無機會，全部未到場，費事見到老友個女同其他男仔煙韌，自己眼冤。老友後來都覺得當日收咗份厚禮，寧願生日宴之後退回，令場面熱鬧些。
銀行如果一早退回那些按揭申請，可能會令人誤會銀行無生意，現在就可以話畀人知，銀行好多生意，有很多按揭申請，批都批唔切，對銀行商譽一定有所提升。
紀惠集團行政總裁
[湯文亮 敢說反話]