2024-07-15
星島日報
我沒有水晶球，10年前在本欄喝住大家若為投資切勿入市，原因好簡單，以常理推斷——個市癲咗。
香港樓價由2004年沙士之後起步，當時平均每呎約2600元，在政府人為操控土地供應（「孫九招」玩唔供應！）及停建居屋，再放內地人來港炒樓，另外當然是在長期低息下，搞到香港樓價如火箭般上升，到2017年呎價已高達2萬多元。
作為一個分析者，小弟絕對有責任忠告大家——就快爆煲！因有項永恆真理——升得越急，插得越快；升得越高，插得越深！
4年前兩度預警「爆煲」
其時未有社會運動，未有疫情，未有移民潮，未有美國大手加息，但從基本資料、經驗判斷，再加一點點直覺，已感到「爆煲來臨」。不過爆也不會一下子直插，開頭只窒下窒下，到2020年我再在本欄兩度警告。
不少老友問：「碌Sir，你估會跌到幾多？」我答：「未到1萬蚊1呎唔會停！」當時怎不被噓爆？每呎2.6萬元會鋤到1萬蚊1呎？究竟係咪譁眾取寵隨口噏當秘笈？
我都想唔中，但不幸近日不少二手盤，包括屯門、天水圍、美孚及個別沙田單位，已見呎價8000多元的成交個案。上周更有屯門新盤以呎價不足1萬元推出，創同區8年以來最低。一日高息未減，移民潮繼續，新盤低價傾銷，內地及本港經濟低迷，在眾多不利因素下，樓市怎可能會反彈？千祈咪信「利益掛鈎者」亂吹。今時今日，你若然想買樓作「投資」，唔該要三思。
「投資」單位要三思
咁自住又如何呢？完全兩回事！最佳用女性比喻，投資是「逢場作戲」，自住則是「迎娶賢妻」！合眼緣又有化學作用的對象，在茫茫人海中，可能數十萬個才會撞到一個，一旦遇上當然死命不要放！切勿因少少經濟原因放棄！
無他，錢可以慢慢搵，但命中注定的姻緣，可能只此一次，況且賢妻必得多人爭！
娶得賢妻是一生人最大的成就，終生幸福通常由這個決定開始。以此代表找到一個理想自住單位，你可能覺得少少誇張，但細想，住得安心愜意，家庭自會和諧，此乃任何成功的基礎，切勿因小失大。
資深傳媒人 曾智華