2024-07-12
明報
【明報專訊】近日有幾場應酬，不少人問我銀行點解仲未解封，借錢畀人買樓，我認為要等多一陣，當銀行解決被call loan客戶問題，銀行就會開始借錢畀人買樓。最近有不少富豪要將他們家族的珍貴物業出售，例如山頂幾間屋，代表被call loan的客戶要賣樓解決問題，當這批客戶賣樓之後，銀行的生意減少，當中包括金融產品類別，銀行就會做生意，急都急唔嚟，大家靜心等待。有一個結果是可以肯定，就是銀行不會永遠不做生意，唔借錢畀人，只識高息搶客，不如改名做接受存款公司好過。
有人話，測量師行估計到今年底，樓價會跌多一成，負資產增加至10萬，銀行不得不為自己着想，早日向客戶call loan，避免招致損失。其實，銀行已經call loan call咗咁耐，有冇聽過銀行出現壞帳？就算有業主被迫賣走他們最優質物業，銀行都沒有損失，至於負資產會不會去到10萬，這是一個問號。測量師行可以講到10萬這個數字，但沒有講擁有負資產的人從事哪個行業，測量師行當然知道，但是唔敢講，而事實上不少人都知道，他們是從事銀行業，因為只有他們可以用低息借高成數按揭，如果出現10萬個負資產，銀行職員佔了9萬，如果話負資產是樓市壓力，反過來說壓力是來自銀行。
有人唔同意我的講法，他們認為政府才是負資產製造者，如果不是有那些八成、九成按揭，就唔會出現咁多負資產。其實，政府容許首次置業者可以有八成、九成按揭，大前提是他們要通過壓力測試，以及購買按揭保險，既然有買按保，就唔算是負資產，而且，用八成、九成按揭買樓的人所擔心的不是樓價升跌，而是供款能力，如果供得起，就不用擔心樓價下跌。當然，樓價上升就更好，現在銀行家有一個壓力，擔心借錢畀人買樓之後，樓價掉頭飈升，咁樣想唔畀人話樓價下跌主要是銀行唔借錢畀人買樓都唔得啦。
紀惠集團行政總裁
[湯文亮 敢說反話]