2024-07-09
明報
【明報專訊】有朋友對我說，近來有一個必定賺錢的方法，就是某家銀行，唔講得係邊家，因為不敢絕對肯定，費事被告，總之係一家大銀行，不是中小行。你存5000萬元定期進去，可收5厘息，它可以多借給你5000萬元，因為是現金1對1抵押，借款可以低到2.5厘，但係你可以把這5000萬元再存進去做定期，又收返5厘息。換言之，即係變相有超過7厘息，去邊度搵？買股票、買樓收租，都無呢個回報啦！我說：「這證明了這家銀行都好無錢，而且很不看好未來，要留錢度過寒冬。」
這位朋友還告訴我一件八卦事，就是有一位仁兄買進了30個的士牌，正準備買夠100個，皆因現時的士牌的行家價是254萬元，但表面上市價是300萬元，可以借到九成，於是，買一個的士牌，還可以有十幾萬元現金進帳。
「吓，滴滴同埋高德進軍香港，特區政府有政策支持喎！」我大吃一驚：「呢位仁兄當年炒股票好像贏了10億元，說唔做嘢退休，現在應該還有七八億元，都輸得起?。」
「唔係噃。」朋友說：「當年他只贏了三四億元，近年輸了幾鑊幾千萬，𠵱家剩番一皮嘢咋喎。」我合十說：「RIP。」
[周顯 投資二三事]