2024-07-08
星島日報
有不少人覺得很奇怪，樓價比高峰時下跌了25%，租金收入減少，利息上升，銀行call loan call到失魂，只見到物業投資者各自賣樓還貸，但聽唔到他們同人呻，如果不是傳媒不斷報道業主劈價蝕錢賣樓的消息，根本唔知道樓市下跌咁多，點解投資者唔同人呻。
食得鹹魚抵得渴
大家都聽過一句說話，食得鹹魚抵得渴，做投資無論是物業，股票，或者金融產品，贏錢的時候笑呵呵，輸錢同人呻，不但不會得到同情，仲會俾人笑贏得唔輸得。
疫情解封時應即撤辣
我認為有一種輸家的確可以呻，就是首次置業人士，政府推出辣招唔准香港人買多一層樓，或者非香港人買樓，否則就要付15%至30%印花稅，做就了一條康莊大道俾首次置業者。
但政府識設唔識撤，辣招延續了十幾年，有心有能力買樓的首次置業者都買了，當購買力耗盡，適逢美國加息，銀行唔放貸，樓市急速下跌，大約跌了25%，只攞10%至20%做首期的物業，全部都變成負資產。
首次置業者不但損失全部訂金，而且仲欠落一身債，他們的確可以呻，但沒有人會同情。
原因是他們向政府施壓推出辣招，又唔准政府撤辣，如果政府在適當時候，或者在疫情解封時撤辣，樓價就唔會跌咁多，他們所買的物業亦不會變成負資產。
湯文亮紀惠集團副主席及行政總裁