2024-07-02
明報
【明報專訊】很多人都知道我是樓市大好友，但睇好樓市並不代表不會賣樓，當我賣樓的時候，一定會有人話我口是心非，既然睇好樓市，點解要賣樓。我話只是「逢三退一」，將不適合，或者空置的物業賣走，就算蝕本都賣，得到資金除了可以用作防守之外，如果碰啱機會，就好似現在咁樣，可以用非常理想價錢，買到優質的物業，不少人話我發噏瘋、亂咁作。
有不少經營多間餐廳的人，在閂最後一間餐廳的時候都非常後悔，他們並不是後悔做餐飲生意，而是後悔當日冇將一些蝕錢的餐廳閂門，而將賺錢餐廳的盈利補貼落去，最初一定可以支撐，但如果仍然有盈利的餐廳收入下降，令到經營者要蝕本，最後不得不將所有餐廳執笠。有經營者同我講，如果早睇到拙作「逢三退一」，就會一早閂了蝕錢的餐廳，唔會出現全線執笠的結局。
關閉蝕錢餐廳 免拖累賺錢餐廳
正所謂英雄所見略同，叙福樓黃傑龍採取「逢四退一」，將一口氣閂4間餐廳，只剩12間餐廳繼續經營，有人話連黃傑龍都睇唔好營商環境，香港冇運行，經濟應該會很差。其實，黃傑龍只是閂了4間蝕錢餐廳，使到那些蝕錢餐廳不會成為其他賺錢餐廳的負累，令到經營集團可以行得更遠，結局更好。
就好似行軍打仗，如果不放棄傷病士兵，一定會成為整隊軍隊負累，最後應贏的戰役變成要輸，如果不識得「逢三退一」，應該賺錢的生意最後可能要蝕本，甚至要全線執笠收場。
紀惠集團行政總裁
[湯文亮 敢說反話]