2024-06-05
明報
【明報專訊】星期日晚上，老婆返了外家，一個人去茶餐廳食碟頭飯，見到一個口痕友，佢話我平日請客咁闊佬，自己食飯咁孤寒，是否打腫塊面充肥佬，唔似得英偉達（Nvidia）行政總裁黃仁勳請客，每席只是5000元新台幣，另外每席有一瓶價值200元新台幣的紹興酒，已經有錢到咁，仲咁慳儉，全世界都一致讚賞。
我話自己不用打腫塊面，就已經是肥佬，如果黃仁勳同屋企人食飯，5000元新台幣一席，絕對冇問題，亦值得稱讚，請客就唔可以。黃仁勳雖然有錢到不得了，但始終是基層出身，父母冇教佢點樣做有錢人，而做有錢人第一戒條就是闊佬別人，孤寒自己，請客不能酒微菜薄，尤其是有錢人，連臭豆腐都上埋枱，真係成何體統，自己就冇問題，食碟豆腐火腩飯，仲話畀人聽這是男人的浪漫。
我同口痕友講，如果我請你食飯，不但冇鮑參翅肚，連拖奴、海膽、和牛都冇，只有那些雞雞鴨鴨，或者有條花尾躉，今日，見到我一個人食大餐，你會點樣講，一定會話我請客就唔捨得，自己就狂食貴嘢。所以，我一個人食飯，就算好想食鮑參翅肚都唔會叫，最多叫條靚魚，口痕友話，充肥佬就充肥佬，仲咁多嘢講。
口痕友繼續講，黃仁勳在6月3日晚宴請員工時，每席18,000元新台幣，唔可以講不懂得闊佬別人，老友可能搞錯，在6月3日晚的是屬於公司宴請員工，黃仁勳即使係老闆，他只是其中一人，如果我開公數，用10萬元一席請同事食飯，絕對不可以話我懂得闊佬別人，我只是開公司數，用老闆啲錢闊佬別人而已。
紀惠集團行政總裁
[湯文亮 敢說反話]