2024-05-17
明報
【明報專訊】有年輕朋友打算買一個中型住宅單位，問我點樣才可以做到九成按揭，即使樓價下跌，都唔會被銀行call loan，佢又唔想買按保，因為保費很昂貴。我知道年輕朋友的資質唔錯，學歷又好，可以隨隨便便搵一份收入唔錯的工作，就算打政府工都冇問題，但買樓都唔可以做到九成按揭，除非……
我同年輕朋友講，只有一個途徑買樓可以做到九成按揭，就係去銀行打工，估計以朋友的外表同學歷，入職銀行是沒有問題。好多人唔知道，原來銀行職員可以借九成按揭買樓，而且利息比正常低很多，所以，銀行職員大多數會問銀行借錢買樓，有咁着數，真係唔買樓就笨。
如果唔係政府「撤辣」，我是不會叫年輕朋友去銀行打工，即使可以借到九成按揭，但「辣招」令購買力大幅減少，一個沒有購買力的樓市，樓價又點會上升。問銀行借九成，物業很容易變成負資產，揸住一個負資產在銀行打工，就要勤勤力力，唔好遲到早退，唔好無端端唔返工，唔好得罪上司，否則被炒魷就大件事，要即時清還銀行欠款。
事實上，有很多銀行職員所買的單位都變成負資產，所以，他們明知向借貸不高於五成的按揭客戶call loan是野蠻行為，但前線銀行職員每一個都唔敢反抗，安安靜靜完成銀行交低的任務。
其實的確有些怪異，一個持有負資產的銀行職員向一個借貸不足五成的業主追收差額，被call loan的業主當然唔滿意。由於被銀行call loan，他們被迫賣走只欠債五成的物業，當利息下調，美元轉弱，樓價就會回升，曾經持有負資產的銀行職員，可以大聲笑住同人講，只要堅持，樓價一定會回升。
至於被銀行call loan而將物業賣走的業主就無話可說，或者，如果唔想被call loan，最好去銀行打工。
紀惠集團行政總裁
[湯文亮 敢說反話]