2024-05-16
明報
【明報專訊】佛誕假期前夕，與幾名投資者食飯，有物業投資者話，雖然現在被銀行call loan call到失魂，但慶幸物業借貸比率低於五成，只要賣走一兩件，便可以滿足到銀行的要求。
不過，最奇怪是銀行知道他賣樓，千叮萬囑叫佢唔好賣走按在他們銀行的物業，投資者決定權並不在他手中，是在買家手中，所以，不能擔保不會賣走按在銀行的物業，銀行家絕對明白這個道理。
記得同一班人，在上一任金管局總裁推出逆周期措施時，他們要求我表達意見，逆周期措施將物業按揭成數由七成降至四成，大大阻礙樓市發展。
老實說，我是少數贊成逆周期措施的人，我當時話大家經常講銀行是「好天開遮，落雨收遮」，在樓價下跌，銀行就會call loan，而逆周期措施就是避免銀行落雨收遮，令香港經濟出現動盪，於是趁樓價上升，降低按揭成數，好天收遮，大家就唔會變「落湯雞」。如果不是有逆周期措施，在七成按揭之下，樓價升幅一定會較大，今日被銀行收遮call loan，一定會變成「落湯雞」。
不過，江山易改本性難移，銀行落雨收遮的本性仍然不變，在疫後政府唔「撤辣」，以及美國暴力加息，不少按揭成數不超過五成的投資者仍然被銀行call loan。其實銀行唔知道，投資者把遮早已被金管局收了，現在行緊騎樓底，唔會被雨淋到成身濕晒，所以，大家仲可以一齊食飯，輕鬆面對問題。
紀惠集團行政總裁
[湯文亮 敢說反話]