湯文亮：靜坐常思己過 閒談莫說人非

【明報專訊】近日有一個專門爆人舖頭執笠群組爆紅，有老友話我們做收租佬，如果見到個客唔準時交租，甚至唔交租，即是執笠先兆，應該放上群組，壯大執笠群組聲勢。 老友講得冇錯，我的確比其他人早些知道租客是否打算執笠，但我唔會同其他人講，只會問點樣可以幫到他們。如果確實做唔住，大家協商解除合約，很多時在劣勢之下，租客可以死裏逃生，不但完成租約，並且會簽訂新租約；如果我公開同其他人講，不但於事無補，而且違反了職業操守。 尊重別人私隱才是關心他人 人生於世，經常都會碰到不少不如意的事，例如小時候升唔到班、被踢出校、追女仔食檸檬，入到社會時被炒魷，做生意失敗，移民之後要回流，甚至離婚、賣樓、患上絕症等，不但唔想其他人知道，仲會強顏歡笑，證明自己冇事。當事人都唔想其他人知道，點解要揭開別人?瘡疤，如果話關心他們才會講，其實更加不合理，尊重別人私隱其實才是關心他們。 我曾經參加一個聚會，一個朋友神采飛揚到場，到了中段，有一個朋友問那個神采飛揚的人癌症是否好轉，那個人沒有回答，但之後沒有再講什麼，唔夠一個月那人逝世，雖然沒有證據那人逝世是否因為那句問候，但已經令到曾經問候的朋友內心非常內疚。 不少人在小時候被教導，靜坐常思己過，閒談莫說人非，不過有人話，閒談莫說人非已經夠，點解要靜坐常思己過。這其實是有理由的，當大家想到自己曾經發生過不少不如意的事，當時沒有人落井下石，今日亦唔好講別人是非。其實，這亦是操守，如果沒有操守，即使專業水平很高，都唔會受到別人尊重。 紀惠集團行政總裁 [湯文亮 敢說反話]