2024-03-20
明報
【明報專訊】有老友話，根據統計，大約有八成新樓由內地人買入，點解我知道如果「撤辣」，一定會有大量內地人來港買樓，就算我的內地朋友在港買樓，亦不能夠代表大多數內地人，一定有一些不為人知的消息。
我同老友講，搵日早些少起身，趁銀行未開門時去中資銀行睇吓，就會發覺有很多人排隊開戶口，那些全部都是內地人，既然在香港開戶口，應該不是一般旅客，他們都是打算來港半定居的人。當中有一些為了工作，有一些為了子女，既然打算半定居，如果有能力的話，首先就會買一個住宅單位，以往要畀30%稅，後來雖然降至15%印花稅，當然唔忿氣，現在政府「撤辣」，唔使畀印花稅，真係唔買就笨，甚至買多幾個，况且政府話「辣招」框架仍在，如果樓價飈升，會隨時再出招，現在不買，更待何時。
銀行call loan或為多做內地人生意
在過年期間，不少銀行到公司拜年，我問其中一間中資銀行的同事，是否有很多內地人來港開戶口，我知道數字後都嚇了一跳，單是一間中資銀行，在今年已經有15萬個國內新戶口，他們最初並不一定買樓，可能買股票、債券及保險等。但根據銀行經驗，最後那些新戶口都會買樓，有咁龐大購買力，點解要睇淡樓市，這亦是政府「撤辣」原因之一，如果再唔「撤辣」，那些人就會去其他地方開戶口及買樓。
有很多持有超過一個物業的業主最近被銀行call loan call到失魂，他們唔明白，雖然租金收入差些少，但資產借貸比率不足五成，理論上是非常安全，銀行點解要call loan call得咁急。答案就是有大量內地客戶申請做按揭，那些內地客戶唔會借得太多，利息又可以收多一些，如果銀行唔準備資金借畀他們，不但損失生意，對銀行信譽亦唔係咁好，釜底抽薪之計，唯有向現有稍為不合資格客戶call loan，除此之外，我真係諗唔到銀行點解會向資產負債比率合格的客戶call loan。
紀惠集團行政總裁
[湯文亮 敢說反話]