2024-03-19
明報
【明報專訊】上星期六，我邀請東瀛遊禤老闆到浸大講做生意如何關關難過關關過，當日300座位座無虛席，亦絕無冷場，禤老闆講當日一個決定，促成今日生意仍然可以繼續下去。
當東瀛遊仍然是細公司的時候，與航空公司攞機票的折扣比大公司大約有兩成差距，大公司有人同佢講，不如東瀛遊的機票由大公司出，將差距五五分帳，對雙方都有利，客人又沒有損失，本來這是一個好方法，但禤老闆等幾個股東不同意，理由是咁樣做，雖然是慳了錢，但只是替對手拼業績，做多十年都無用，航空公司只會識得競爭對手，而唔會識得東瀛遊，不如薄利多銷，希望可以打出一條血路。
香港恐變深圳衛星城市
有人問我大昌食品公司點解要結業，我話這只是開始，在未來一段時間仲有很多食品公司，甚至超市要結業，老友話是不是因為港人北上消費，其實北上消費無問題，今日去深圳，下星期去佛山，下個月去潮州玩，但現在港人並不是北上消費，而是北上購物，無時無刻都會去深圳買糧油食品，港人買得多，深圳超市所取得的折扣愈多，成本愈低，無形中拉開香港與深圳的成本價，售價亦會愈來愈有差距，令到更加多人北上購物，香港更加多超市執笠，到最後，香港人買米都要返深圳買，香港變成深圳衛星城市。
今日北上購物的人，有不少是當日支持限奶令，他們認為，內地人買晒香港奶粉，令到香港人冇奶粉買，老實說，又點會買得晒，那些支持限奶令的人唔知道，內地人買得愈多奶粉，香港進口商的折扣愈高，售價愈平，最後的受惠者仍然是香港人，點解要反對，諗極都唔明。
禢老闆講，做生意有一個關鍵字，就是平，平就會有生意，但如何可做到平而賺錢，就是要多，所以做生意要賺錢就要搶客而非限制顧客，老實說，限奶令事小，樓市辣招才大鑊，辣招令不少打算來港的內地人去了新加坡，香港有乜辦法唔輸，好彩政府「撤辣」，否則樓價繼續下跌，大把香港人變成負資產者，地產商又唔買地，千億元財赤常態化，財爺都唔知要點樣做才可以扭轉乾坤。
紀惠集團行政總裁
[湯文亮 敢說反話]