2023-10-16
星島日報
有不少人認為，香港經濟轉壞，夜繽紛又搞唔起，就算撤銷壓抑樓市印花稅，不但幫唔到打算買樓的人，仲令到政府少收一大筆特別印花稅，最大鑊就是放生了炒家，樓價再度飆升，搞到民不聊生。
幫人變成害人
那些人唔明白辣招稅如何令香港墮落，辣招稅美其名是壓抑炒家，令到有需要的市民可以低價買樓，但是他們不知道，辣招稅亦壓低了那些人的收入，工作以及晉升機會，換句話說，表面上是幫了那些人，其實是害了他們。
假定在撤銷辣招稅之後，一個內地人因為唔使俾三千萬元印花稅而來港買一個億元住宅，之後就要請家傭、司機，為香港最少提供兩至三個工作機會，業主的小朋友可能到香港讀書，而令到不少準備被殺的學校可以改為私立學校，玫瑰崗學校就是一個好例子，新私立學校亦要聘請相當多教職員人數，無形中亦為香港提供不少就業機會。
既然小朋友在香港讀書，父母有可能在香港做生意，首先會租用一些商廈，如果做得唔錯，就會買入大面積甲廈，甚至以香港為做生意基地，做生意自然要請人，自不然會提供不少就業機會，講到現在，撤辣的連鎖效應已經令到不少人得益，政府的稅收亦有所增加，少收的辣招稅早已彌補，撤辣是利大於弊，越早撤越好。
湯文亮
紀惠集團副主席及行政總裁