2023-05-12
明報
【明報專訊】一般人有一個誤會，認為銀行是「好天遮」，尤其是在處理過期未能供款的物業，會以最快速度收樓，變成銀主盤之後立刻出售，幾日都唔等得。
其實這是錯覺，銀行對於未能供款的按揭客戶，收樓是最後辦法，就算物業變成銀主盤，到正式出售仍然有一段時間。如果是招標的話，最低限度有多3個月，如果銀主盤在出售之前，業主還清所有欠款，銀行一定會將物業交還給業主，並不是幾日都唔等得，大家千祈唔好誤會。
太快賣走易捱告
不過，話分兩頭，在2003年前後，銀行處理銀主盤是非常急速，債仔唔還錢就立刻告上法庭，收樓出售，可能只是一兩個月時間，理由是當時銀主盤太多，最低限度有十萬個，而且大多數資不抵債，銀行如果不快速處理，在樓價不斷下跌之下，恐怕愈輸愈多，但現在的銀主盤欠債與物業市值有一大段距離，銀行在賣樓之後仍然有一大筆現金退回給按揭客戶，所以銀行可以慢慢小心處理。如果在這段時間客戶將物業賣走，或者搵到新銀主，便可以還清欠債，唔使搞到兵戎相見，所以，現在銀行處理銀主盤是非常小心，如果太過快將客戶的物業賣走，有可能被客戶告銀行賤賣物業。
銀主盤標售料增
有一些醒目的債仔，到最後一刻才將物業轉去財務公司，目的是畀少一些利息，因為銀行與財務公司的利息差距實在太遠。所以，銀主盤招標出售是拖延時間的一種方法，而且招標的時間愈長，對業主與銀行都有利，業主可以畀少一些利息，而銀行可以多做生意，估計在未來一段時間，將會有很多銀主盤以招標方法出售。
紀惠集團行政總裁
[湯文亮 敢說反話]