2023-02-27
明報
【明報專訊】星期五晚收到發展商一個信息，四隻字「一Q清袋」，我立刻回覆恭喜恭喜，大家可能唔知道，要做到「一Q清袋」是要有一些基本條件，否則，係人都會話，只要減價，便可以做到「一Q清袋」。
首先，所有老闆都唔鍾意「一Q清袋」，因為「一Q清袋」代表賣樓主管開價仍然未去到盡，如果去盡就唔會「一Q清袋」，賣到八成已經好好，所以，第一個條件就是要有一個好大方的老闆，最低限度唔好將「一Q清袋」變成一個十惡不赦的罪，否則，即使今次「一Q清袋」，下一次都唔會再發生，售樓主管唔敢畀「一Q清袋」再發生。
第二個條件很怪，就是市况淡靜，但市場有強勁購買力，有人質疑，點解要市况淡靜？因為市况熾熱，試問售樓主管點敢低價開售，就算賣唔到都唔緊要，老闆又唔會鬧，遲幾個月賣得仲貴，市况淡靜，老闆才會接受低價發售，不過，亦要市場有強勁購買力才可以「一Q清袋」。
強勁購買力要用信心求證
至於點知道市場有強勁購買力，這點就要靠經驗，仲要加一點信心，經驗經常都是提出負面因素，如果沒有信心，就幾時都唔敢賣樓。事實上，樓市已經淡靜了一段時間，成交量不足正常一半，如果有信心就會認為樓市積聚了一批購買力，立刻開盤；如果沒有信心，就會認為香港人冇錢買樓，唔敢開盤，所以，強勁購買力是要用信心求證。
另一個條件就是出售單位的售價是差不多，如果發展商刻意調低幾個單位售價，造成大幅超額認購，最後可能適得其反，大多數買家打算買那些超平單位，如果見到已經售出，他們便會放棄選購，結果不但不會「一Q清袋」，甚至成績甚差。
「一Q清袋」的作用當然是刺激樓市，但如果發展商為求豐厚利潤，其他樓盤開價非常進取，很容易撲滅樓市剛剛燃起的火焰。
紀惠集團行政總裁
[湯文亮 敢說反話]