2023-02-03
明報
【明報專訊】朋友是個地產發展商,遇上樓市熊市,我問他,究竟會不會減價?
他說:「我們都是寧願加經紀佣金,都不會減價,一來減價會令到客人失信心,影響公司品牌,二來推跌樓價,自己也沒好處,三來當然是,加佣金比減價更有效力。至於經紀會不會回水給客戶,我就不知也不理了。」
我問:「咁你有無其他優惠,例如幫客戶畀印花稅之類,要知道,三成印花稅好溶㗎喎。」
他說:「畀印花稅就無,不過可以按你意思去裝修間屋,免費贈送。」
我說:「𠵱家個市咁差,細價樓就話易賣,幾億銀一間豪宅,好難賣出去喎。」
他說:「你估賣豪宅好似賣細價樓咁,自動有人買咩?你又估個經紀究竟有幾叻,識幾多個人,可以賣到豪宅?賣豪宅同賣殼一樣,都係要老闆親自同friend sell㗎!」
我說:「咁你身為全國政協,身分地位咁高,喺大陸識咁多人,如果要sell,就梗係有啲辦法。不過對未來個樓市,你又點睇?」
他說:「完全看好!內地大開放,好多朋友摩拳擦掌,想來香港買樓,我已經同他們約好,逐個嚟香港睇我啲豪宅,4億銀一間,好濕碎,我親自起㗎,用料足,裝修靚,我好有把握好快賣晒,幾間咁大把之嘛,有幾難啫?」
[周顯 投資二三事]