2022-10-03
星島日報
有老友話，本來物業代理本着賣花讚花香心態，在大多數情況下只會話樓市上升，保持平穩已經是最負面說，但現在大大小小的物業代理都話樓價下跌，甚至有個別物業代理話樓市下跌五成，估計樓市下跌應絕無懸念，甚麼開關，減壓力測試都冇用，樓價仍然會下跌，而事實上樓價指數已經連續下跌了10星期，估計仍然會下跌多幾個星期，才會有一次小小反彈。
料樓價指數持續下跌
很多人不明白點解物業代理會肯定樓價下跌，其實，現在做物業代理很慘，較早前不少物業代理異口同聲話樓價下跌，令到不少業主劈價賣樓，甚至蝕讓都賣，在銷售方面無疑是很成功，但講得太盡，阿媽都知道在開關之後樓市就會穩定下來，現在加上減壓力測試，有資格買樓的人多了很多，樓價就算唔升，都唔會下跌，不過，物業代理講得太盡，現在死頂都要話樓市會繼續下跌。
有老友唔同意，物業代理行有咁多分析師，唔係好似我亂咁吹，他們肯定樓市下跌一定有數據支持。我話有分析就最好，如果10個星期前政府宣布開關，中原指數會不會連跌10個星期，就算不是一半一半，都會係6上4落，中原指數不停下跌超過2%，老友話有可能，不過他都是寧願相信物業代理，說到底我是一個物業投資者，如果肯定樓市下跌，最後樓市真的下跌就冇所謂，否則就會被人話食碗面反碗底，好大條罪。
湯文亮 紀惠集團副主席及行政總裁
湯文亮 地產論壇