2022-09-06
明報
【明報專訊】在全城一致唱淡之下，中原指數六連跌，幅度又不算很大，比高峰時只跌了8％，或者還要跌多幾個星期才可以回穩，但已經令到賣了樓的人非常雀躍，認為自己做了前所未有咁好的決定，同時嘲笑那些仍未賣樓的業主，認為他們已經錯過了樓市的逃生門。我亦經常被人問，如果移民潮持續，美國聯儲局又加息，我有何打算。我話只得一招，就是高資產低負債，即使加息，應該可以頂得住。至於移民潮，有人走亦有人嚟，一雞死一雞鳴而已，唔需要有何打算。
輪到我問那些賣了樓的業主，賣了樓之後有何打算，如果是移民就不用回答。我想不到有部分賣樓的業主話，有錢根本不用打算，首先租一個比賣走的更好的單位住，如果樓價跌得咁上下，就用低價買番一個住宅單位，這才是投資之道，並不是死守唔賣樓。
那些賣樓業主九成未試過租樓，賣樓之前那些幫他們賣樓的物業代理會話，又平又靚的租盤多到成街都係，但賣樓之後，那些代理與又平又靚的租盤都失了蹤，如果搵第二個物業代理幫手租樓，可能得到回應是賣樓的時候唔搵佢，點解搵佢幫手租樓，唔係冇租盤，不過會是那些地點不佳、方向不好兼低層、冇人吼的租盤。
唔好以為有錢大晒，香港的業主係好串，况且如今在辣招之下，香港人買樓收租的已經買少見少，業主對租客的要求很嚴謹，內地生早已知道這個困難，不但願意付較高租金，而且一交就交一年租，試問那些賣樓的業主又如何比併？所以，如果要賣樓，要首先嘗試租樓，甚至租了樓才賣，否則到交樓時仍未租到樓就知道痛苦。
紀惠集團行政總裁
[湯文亮 敢說反話]