2022-07-04
明報
【明報專訊】回歸日見到一個一向唔睇好香港老友，佢話剛剛以超市價買了一個單位，我話有冇搞錯，現在報紙日日都有報道話有單位蝕讓，點解要用超市價買樓？老友話數字是不會呃人，雖然報道話有大量蝕讓，但上星期四中原指數反而升了超過1％，除非中原指數做假，否則代表有大量超市價成交沒有報道，所以，可以睇新聞但不能盡信。
我問既然老友睇唔好香港，點解仲要在香港買樓？老友話，佢一向都睇好香港，亦一直有買樓，但原來很蠢，那些打算賣樓移民的業主會話，既然睇好香港，應該出高價買他們的物業，否則就是壓價。老友於是改變策略，公開表示唔睇好香港，與那些即將離港的業主「夾嘴型」，壓價都可以理直氣壯。不過，那些賣樓移民的業主並不是儍的，他們雖然睇唔好香港，但要價是很進取，仲鐵價不二，所以，最近老友買的物業比市價略高，主要是因為質素不錯。
移民英國後賣港樓 或繳增值稅
至於點解有咁多蝕讓，其實是與用BNO去英國有關，去年用BNO去英國的人，大多數不是業主，而且走得很匆忙。今年去的有部分是有物業，他們發覺，用BNO去英國，即使要等「5+1」才可以成為英國人，但抵埗當日，已經成為賦稅居民，香港以及在世界各地所擁有的資產，都要繳付40％增值稅，並不是由抵埗當日計算，而是由買入物業當日計算。假設物業是在20年前買入，如果不在抵埗前賣走，是要付賺價40％作為稅金，不少業主低市價賣樓的心態是益香港人好過益英國政府。我覺得心態唔好，既然用BNO移民，就要效忠英國政府。
至於點解有蝕讓，因為在抵埗前唔賣樓，十年八載之後才賣，到時可能發覺，這十年收的租金都未夠交稅，如果有三長兩短仲大鑊，後人不但要交增值稅，仲要交遺產稅。
紀惠集團行政總裁
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意。）
[湯文亮 敢說反話]