2022-06-30
明報
【明報專訊】有老友去送兩名高級職員移民英國，見到一班伙記都嚟送行，他覺得非常奇怪。因為在較早前的送行宴，兩名高級職員一唱一和，認為香港已經冇前途，今日唔走，明日唔知可唔可以走，並且指出，有證券公司話香港明年樓價會下跌15%，兩名職員覺得證券公司的報告是非常厚道，明年樓價一定唔止跌15%，而且後年會繼續下跌，真的是早走早着，遲走瞓唔着。成班伙記食得背脊骨落，老友亦非常冇癮，所以，一班伙記嚟送行的確是出乎意料之外。
高級職員移民 不少員工升職
老友仲發覺一班伙記不但嚟送行，而且仲拉起橫額，但上面寫的字老友不認識，甚至連字母都唔認識。我話我知道，橫額上寫的是俄羅斯文字，今次俄羅斯人的確幽默，將離開俄羅斯的世界名牌第一個字母拼成了一個字，意思是「我們取代了你」。麥當奴俄羅斯版已經重開，其他品牌估計亦會有俄羅斯版，我講大家未必會相信，未來俄羅斯版的世界名牌可能比正版還要值錢。
老友話唔怪之得，由於有兩名高級職員離開，他從內部晉升，造成一個連鎖反應，不少同事都升了級，所以，同事拉起「我們取代了你」的橫額，意思是叫離開的高級職員唔好返嚟。
我估計老友那兩名移民離開的高級職員去到英國後發覺橫額真正的意思一定會唔開心，老友話咁都好，否則一年半載之後，那兩名職員回流，都唔知怎樣處置，現在早一點令他們知道已經被取代。
紀惠集團行政總裁
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意。）
[湯文亮 敢說反話]