2021-08-26
明報
【明報專訊】有老友問，在酒樓飲宴，准打麻雀，唔准打天九，是不是因為天九牌很容易變成賭具，打打下天九， 見人多，就轉打牌九？我話這是一個小理由，因為麻雀亦可以變成賭具，現在更有所謂麻雀牌九。我認為政府在設立這條法時，一定是考慮到打天九很容易令到老友反目成仇，在飲宴場合，出現火爆場面就唔係幾好。至於打天九點解會令到老友反目成仇，如果識得打就知點解；如果唔識，就算我大費唇舌都未必會明，大家知道結果就可以。
減少反目成仇風險
我唔講大家未必會留意，除了打天九之外，夾錢買樓亦會令老友反目成仇，樓價上升，有老友話要賣，但亦有老友話唔賣，樓市會繼續上升。倘若冇賣，話唔賣的老友就會話好彩冇賣，贏了牙骹，打算賣的老友當然冇話可說，這是一個最好的結局。倘若樓價下跌，原本打算賣的老友一定會埋怨那位唔肯賣樓的老友，話有錢都唔識得賺，最後可能連老友都冇得做。
雖然有不少人批評政府壓抑樓市的辣招，但大家可能想不到，辣招令到不少老友不會反目成仇。因為如果老友夾份買住宅樓，因為就算揸十分之一股權，都已經喪失了首置配額，買第二個單位的時候就要付15%印花稅，辣招無形中令到很多老友不會夾錢買樓，亦減少老友反目成仇的風險，算不算是錯有錯着。
紀惠集團行政總裁
[湯文亮 敢說反話]