【明報專訊】前特首董建華喺香港回歸初期推出八萬五建屋計劃，但遇着金融風暴，被指係令樓價大挫?其一原因。前特首、全國政協副主席梁振英（CY）就重提往事，話董建華當年受社會輿論壓力同埋喺「反對派」議員反對下，無奈放棄八萬五，CY認為如果當年政府可以堅持實現呢個計劃，香港今時今日就已經解決到房屋問題咁話。
CY仲話「當年董生同我」同埋其他對房屋問題有客觀全面認識?人，「包括董生在內，都好想繼續推八萬五」，但反對派反對下無法推動，佢形容當年「只問聲明大小、不問科學客觀」，惡果就係今日要搵地建屋。回顧歷史，當年除咗「反對派」議員，建制派以至市民、商界都有唔少反對聲音。
另外，土地供應專責小組早前為「土地大辯論」推出問卷諮詢公眾，小組主席黃遠輝昨發網誌，話喺北區見到對老夫婦，仔女係專業人士，但都受房屋問題困擾，兩老喺問卷上寫「為下一代設想，幾乎支持所有能增加土地供應的措施」，望住兩老蹣跚背影，有一絲感動。黃遠輝形容，無一個收集意見?方法係完美無瑕，但只要大家抽十幾分鐘填問卷表達意見，「真正的民間智慧還是會走出來」。