2016-12-19
明報
【明報專訊】上星期美聯黃子華生日，佢話心情唔係幾好，只想幾個老友食餐飯，問我去唔去，我話就算可以去都要第三輪，所以都係唔去，祝子華生日快樂好了，至於子華點解心情唔靚，我估計同上周有名美聯同事因離婚及財困自殺有關。
其實做物業代理，賺到錢買樓收租是絕對正確，炒樓就不行，因為如果參與炒樓，遇到一些筍盤，首先是自己考慮，又會先將自己的物業介紹給客戶，無論賺與蝕，客戶知道後一定不高興，千祈唔好以為替客戶賺錢就沒有問題，客戶會認為因為物業代理有利益關係，所以他賺少咗，表面上他們不動聲色，以後便會對那名物業代理有戒心。
代理炒樓 客戶有戒心
老實說，我亦遇過類似情况，並且給那名代理笑我是傻仔，結果，以後的交易自然是零，而且他並不只得我一個傻仔，最後就要離開這個行業，原來他才是大傻仔，這是一條大道理，做物業代理如果唔參透箇中道理，很難成為一個頂級物業代理，千祈又唔好以為做頂級物業代理賺好多錢，可能不及一些中層有不俗的物業代理，因為那些物業代理有時會遇上一些減價貨，但又唔可以即時搵到客戶，惟有自己接貨收租，十年八載之後，那個物業可能有倍數升幅，但如果他接貨後轉售，在七除八扣之後，賺得10個8個%，只要有一次錯誤，所有利潤就會付諸流水，甚至有所損失，欠下巨債。
押錯注隨時被收樓欠下巨債
所有炒家，無論他是否是物業代理，在他開始炒樓時都只是小注怡情，但愈炒愈心雄，愈炒愈大，做物業代理的炒家，見到一些筍盤，首先並不是介紹給自己的客戶，而是想辦法將物業買下，於是組成什麼三人組，四人組，久而久之，他們就不會做物業代理，索性炒樓便是了，好結局不是沒有，但很少，所以，我認為做物業代理應該專注自己事業，賺到錢買樓收租，一樣可以積聚到不少財富。
紀惠集團行政總裁
[湯文亮 敢說亮話]