2019/03/27
文博
香港樓價近年屢創新高，早年買咗樓嘅朋友「我真係恭喜你呀」！
一眾未買樓嘅兄弟姊妹們都唔使灰心，因為下一個上車嘅可能就係你。
而係香港地置業，基本上都會用到銀行嘅按揭貸款「上會」。
但隨著樓價不斷創新高，身邊好多朋友都呻「供款唔難，儲首期好X難」。
所以好多人都會申請高按揭成數買樓，而申請高成數按揭會牽涉按揭保險，批核會較為嚴謹。
而以下有幾點係特別需要注意：
1. 文件要齊
價值400萬或以下的物業，在配合按揭保險的情況下最高可承造9成按揭；
價值600萬或以下的物業，在配合按揭保險的情況下最高可承造8成按揭。
申請6成或以下的按揭時，銀行一般只需要提供3至6個月的入息證明便可批出按揭。
但申請高成數按揭時，按揭保險公司的要求會比銀行更為嚴謹，除左入息證明外，強積金供款紀錄及稅單亦需提交。
申請按揭保險一般所需文件有：
(1)最近3個月入息證明 - 若非固定受薪，最少需要準備最近6至12個月入息證明或者糧單
(2)出糧戶口紀錄
(3)最近2年稅單
(4)貸款之還款記錄
(5)臨時買賣合約
(6)信用卡月結單
由於申請按揭保險所需提供或長時間的文件，所以需要申請按保嘅朋友就要早啲準備定所需文件啦。
2. 切忌沽注一擲
好多時我哋問到邊間銀行嘅Offer最好，之後就只係向嗰一間銀行申請按揭。
但當要申請高成數按揭時，切忌只向一間銀行進行申請，同時間要確保所申請嘅銀行採用不同嘅按保公司。
由於市場上可以申請按揭保險嘅公司只有3間，即係話大家經銀行申請高成數按揭時，最後都會倒灌返落呢三間按揭保險公司到。
假設A先生向三間銀行申請高成數按揭，但三間銀行卻採用同一間按保公司。
萬一該按保公司不獲批，到時候就真係「頭都大埋」。
而且申請按揭保險需時，所以一般操作都係一開始就申請數間採用不同按保公司嘅銀行，將不獲批嘅風險減到最低。
3. 真係決定入市，諗定Plan B！
承接上一點，因為唔同銀行同按保公司嘅批核準則都有略有不同，若然簽咗臨約但預算緊張，如果最後高成數按揭不獲批就可能只有撻訂。
係呢個情況下，若然決定要入市，一定要諗定方法處理嗰兩至三成嘅資金先至好簽約。
所以大家要申請高成數按揭嘅時候，記得要作最好的安排及預備最壞的打算，咁就萬無一失啦。
（文章內容純屬作家個人意見，並不代表本網頁立場）
贊助
