用發商展按揭買入樓花，可以轉按至銀行高成數按揭慳息？

好多人買樓花嘅時候都會用到發展商按揭（一按/二按），而發展商按揭其中一個特色就按揭利息係首2至3年會嘅較低，基本上睇齊銀行按揭利息，但低息期過後按息會大幅抽升。若低息期過後未能將物業轉按至銀行，供樓壓力將大大增加。如果用發展商按揭買入咗樓花，想轉按到銀行，又有咩需要注意嘅地方？

轉按時物業必須為現樓

現時樓花期一般為2至3年，有時候亦會出現遲收樓嘅情況。若然物業係低息期完結時亦未完成收樓，業主只能繼續捱貴息直至收樓程序完成。而收樓後約一個月，等物業轉為現樓契之後，銀行先會接受轉按嘅申請。

樓價限制

由於高成數按揭樓價適用範圍為$1000萬以下，若超過$1000萬嘅物業係無法由發展商按揭轉按到銀行。假設數年前以$900萬買入樓花，並申請咗銀行一按及發展商二按合共$720萬，現欠按揭$680萬，而目前樓價由$900萬升至$1100萬。

由於$1100萬物業最多只能做5成按揭，即$550萬，若要由發展商按揭轉按到銀行慳息，就需要自己額外拎$130萬還比發展商，否則就只能夠繼續捱貴息。

萬一遇到以上情況，大家不妨試下搵多幾間銀行估價，如果有銀行估到過$1000萬，就符合高成數按揭嘅樓價限制，可以申請轉按到銀行慳返啲利息。

轉按最多只能做8成按揭

由發展商按揭轉按到銀行高成數按揭最多只能做8成按揭，即使物業價值$800萬以下亦唔能夠做9成按揭，而且轉按亦不具備套現功能。以發展商按揭買入樓花，係低息期完結時物業估值不幸下跌，申請人想甩走發展商按揭亦就需要自己抬錢還比發展商，又或者繼續捱貴息直到樓價上升至可以轉按嘅水平。