大師大師，邊間銀行按揭最易批？

相信對於絕大部分朋友嚟講，由簽訂臨約直至銀行成功批出按揭，呢段期間一定都會處於緊張嘅狀態。所以筆者經常收到有關「邊間銀行最易批」嘅查詢，咁其實邊啲銀行按揭又真係易批啲呢？ 其實各大銀行對客人批出按揭，須符合金管局規定之最低要求，例如$1,000萬以下物業最多可做6成按揭（或最多$500萬），及需要通過供款與入息比率及壓力測試要求。如果連最低要求都過唔到，筆者只能表示遺憾。客戶朋友買樓前緊記要計清楚自己嘅借貸能力，未計清楚前切勿衝動簽臨約！ 由於各銀行內部批核準則略有不同，係A銀行「難批」嘅個案，可以係B銀行較「易批」。若要將按揭申請成功率提高，你應該將自身情況詳盡交代予按揭顧問，按揭顧問方可以作出準確嘅判斷，為你轉介「最易批」嘅銀行！ 而銀行按揭批核準則各有不同，花款種類之多有時候更超乎你想像。筆者為大家說明一下： 資產審批按揭 現契物業，有銀行可以無需提供額外資產證明而按盡4成；有銀行只要銀行戶口內有相等於一年按揭還款之金額亦可批足4成；亦有銀行需要額外提供物業以外的資產證明方能按盡4成。 曾經破產客人 對於曾經破產嘅朋友，有銀行會直接拒絕申請；部分則要視乎客人破產時有否於該銀行有未償還債務，如果沒有亦可申請；有的則需要遞交申請後由審批部按個別情況處理。 物業類別 部分銀行不接受未補地價資助房屋之按揭申請，因此未補地價資助房屋按揭選擇會較一般私樓為少。而村屋按揭同樣亦唔係所有銀行都做，即使接受申請之銀行對於村屋要求亦略有不同，例如對於村屋大小嘅要求、村屋距離交通集匯點之距離等等。 事實上，各大銀行內部批核準則差異可以很大，以有限篇幅筆者亦不能全部列舉。 總而言之，只要將你嘅個案詳細交代，一個有經驗嘅按揭顧問（例如筆者）可以引導你一步一步搵到「最易批」嘅銀行做按揭申請，變相大大提高批出按揭嘅成功率！