申請按揭前轉工兼大幅加薪，高成數按揭大步擸過！

申請高成數按揭前轉工兼大幅加薪，驟眼睇申請人應該都九死一生難逃撻訂嘅下場。但天無絕人之路，只要搵啱專業嘅按揭顧問絕對可以救你一命。 申請高成數按揭要過兩關，第一關就係要通過銀行內部審批，俗稱批六成。當過咗第一關，接住落嚟就要通過埋按保公司，申請按揭成數六成以上部分就係由按保公司決定批唔批。 今次個案，客人簽訂臨約時，新工剛好做夠三個月，而月入就由原來4萬大幅增加至12萬，升幅達300%。客人到銀行申請按揭，發現銀行對其月入真確性存疑令整個申請卡關。客人心急如焚四處求救，最終經友人介紹認識筆者，希望可以將佢拯救。 選擇合適銀行成致勝關鍵 各銀行審批按揭時均需依照金管局規定，但銀行內部審批準則各有不同鬆緊有別。客人若能選擇到審批準則最利就嘅銀行，申請自然水到渠成。 今次個案中，客人固定入息，銀行A除要求3個月入息證明外，更要客人額外提供多1至2個月入息證明作審批。而最令客人擔心嘅係，客人被公司通知受疫情影響將要減薪，若客人補交減薪後之入息證明將會影響按揭批唔足，而銀行B則只需客人提供3個月入息證明作審批即可。 最後，銀行A連內部審批關卡都過唔到，而銀行B則蝪通無阻，連按保公司都直接批埋。 當然，銀行A係客人自己隨便到銀行申請，而銀行B則由筆者為其精心挑選。 篩選文件，增加說服力 客人申請按揭前轉工且大幅加薪，銀行對此類申請態度的確會更為緊慎。而申請按揭遞交文件並非愈多愈好，客人只需將必要及對審批有利之文件遞交即可。 於咨詢過程中，發現客人原來具有博士（Phd）學歷資格而且有相關工作經驗，跳槽後大幅加薪實屬情有可源。而客人過往於初創企業工作，薪金的確出現underpay情況。 因此，除提供必須要之入息證明，如稅單、糧單及出糧戶口記錄，筆者同時將客人相關學歷證明一併遞交，及客人自我聲明並未持有公司股份，僅為受薪員工，藉此增加就服力，按揭最後亦順利批出。 識得篩選合適證明文件，對於按揭審批具正面影響。銀行及按保公司對於批核亦人性化，只要所有資料真確及具能合理解釋，死症有時候並唔會死。 專業按揭顧問助你起死回生 按揭顧問作為客戶與銀行中間一條重要嘅橋樑，除咗為客人轉介銀行外，更重要嘅係可以確保客人順利取得按揭。 今次個案中，當客人從銀行A卡關而且大訂已俾時，一度考慮過撻訂並同業主商討殺訂殺少啲。但客人向筆者咨詢後發現情況並非想像中咁壞，而且現實層面考慮筆者亦唔覺得業主會肯讓步，所謂「訂到業主手，一去無回頭」，所以客人最後都依照筆者建議處理並順利批出按揭。一個專業且有經驗嘅按揭顧問可以將你從撻訂邊緣拯救過來，但事後補救實為下策，預先做好充足準備方為上策。 事實上並非每次都好似個案中客人咁好彩可以大步擸過，所以筆者經常教育身邊嘅客人朋友，買樓第一步係要了解清楚自己嘅按揭借貸能力，除非你打算Full Pay買樓。而最直接嘅方法就係搵一個可靠嘅按揭顧問咨詢，將自身狀況交代清楚並詢求意見。 過往亦有客戶朋友於簽臨約前搵筆者咨詢，發現當時難以取得銀行按揭，最後決定重新部署，免卻撻訂之苦。 要記住，與其臨渴掘井，不如未雨綢繆。