別妄想17年後嘅今日會重現「沙士」價

股神巴菲特有句明言「別人貪婪時恐懼，別人恐懼時貪婪」，於股市及樓市一樣適用。「不過我個人比較貪心，我想等到樓市返返去「沙士」再入市」，如果你抱住以上諗法的話，筆者唯有為你送上衷心祝福。但疫情衝擊樓市必然發生，作為市場參與者，我哋應該如何自處？ 收緊按揭政策 過去按揭政策寬鬆時有利於炒賣，投機者充斥市場。不過自從2009年，政府收緊按揭政策及不斷加辣後，大大減低炒家生存空間。隨著收緊按揭成數及按揭保險之樓價上限、實施新住宅印花稅（劃一15%）、買家印花稅、額外印花印及壓力測試等等，市場開始由剛性需求主導。現時市場由用家主導，即使樓市受疫情衝擊，亦不至於當年插水式直達谷底。如果你係自用業主，供得起樓嘅情況下你會大平賣嗎？ 有經驗嘅香港人 聽上去可能有點可悲，香港人經歷「沙士」後唔夠廿年又要再經歷一次「武漢肺炎」，街上出現人人口罩嘅場面。但對於樓市而言，香港人心裡明白「沙士」時間業主大平賣嘅情況可一不可再。而且當時2003年前，樓市係經歷97年金融風暴後已經每況愈下，只不過出現「沙士」令本來已經奄奄一息嘅樓市最後壽終正寢。而過去不少業主「落錯車」致今時今日仍然上唔翻車，相信前車可鑑，跳樓大平賣可能性幾乎係零。 量化寬鬆重臨 當亞洲疫情相對開始穩定，歐美國家卻迎來爆發，而美國聯儲局連議息會議都等唔切就直接宣佈減息一厘及重新推行量化寬鬆。也許肺炎傳染性之高令西方國家始料不及，加上外國文化唔戴口罩亦令情況加劇。 量化寬鬆只會將資產價格不斷推高，於2008年後已經得到驗證。參考中原城市領先指數CCL，2009年CCL約60點，直至今日CCL為170點，過往香港樓價愈算愈有亦拜量化寬鬆所賜。當量化寬鬆重臨，樓價還會大跌嗎？ 當然，筆者並非樓市大好友，樓市因疫情影響會出現下跌乃不爭事實。但基於上述幾點，筆者不認為今次跌市會出現好似「沙士」個種跳樓大平賣。只要當疫情開始受控，樓市亦會一切如常。