買樓時候要留神「轉介表格」勿亂簽

每宗銀行按揭都可經由一間地產公司作為轉介，而完成按揭後銀行會向轉介人提供轉介報酬，而銀行只會承認一個轉介人。如果申請人簽署多張轉介表格並遞交予銀行，亦只有其中一間可以成功登記並取得轉介報酬。而過往有朋友曾經想搵筆者協助處理按揭申請，但礙於簽咗其他公司嘅轉介表格以致未能幫忙轉介。而亂簽呢張轉介表格可能會大大損害申請人可以得到嘅潛在利益。 而申請人經常中伏嘅時間主要有兩個：第一、就係買一手樓抽新盤時，地產代理會鼓勵客人簽署轉介表格，示意簽署後可得到部份好處，例如介紹銀行職員及提供少許超市禮劵等等，而抽新樓現場好多時間兵荒馬亂，客人有時候未來得切考慮就已經於轉介表上簽署。第二、就係買樓簽署臨時買賣合約時，許多地產代理會將轉介表格連同臨約一併給予客戶簽署，由於文件繁多，不少朋友事後連簽過咩文件都唔太清楚。 而若然無諗清楚就亂簽轉介表格可能會有以下損失： 失去大額現金回贈 現時許多按揭轉介公司都會為客人提供額外現金回贈，一般為貸款額之0.1% – 0.3%不等。而好多時候經其他地產代理轉介，地產代理並不會提供額外現金回贈予客人。以平均每宗按揭貸款額$400萬為例，0.3%的額外現金回贈相等於$12,000，如果因為無睇清楚簽錯名而損失過萬現金回贈就唔抵啦！ 而即使搵按揭轉介公司代為轉介亦需注意該公司對給予的額外現金回贈「口講口賠」，有沒有書面承諾，例如向客戶發出「回贈承諾書」等等。 整個過程提心吊膽 過往唔少朋友都曾遇過質素參差嘅地產代理，手法不良嘅地產代理經常以「得、得，得」回應客人，即使本身對按揭批核唔熟悉亦「得得得，實批到」。曾經試過有客人誤信質素參差嘅地產代理，以致按揭批唔到而撻訂收場。相反選擇一間具經驗及服務良好嘅轉介公司，可免除後顧之憂。 補救方法 若客人有心搵按揭轉介公司協助整個按揭安排，卻又不慎簽咗其他轉介表格其實亦有補救方法。由於目前只有三大行（中銀、匯豐、恒生）內部有插旗制度，以先登記先得形式處理。若已簽署其他轉介表格而向三大行申請按揭，除非得到原轉介人同意否則不能轉換轉介人。而三大行以外，均以客戶申請時的意願為依歸，即使之前簽署過其他轉介表格亦可搵轉介公司協助。