遲咗供樓以致不能轉按？

相信好多朋友都試過遲還卡數，遲還卡數只要唔係慣犯，好多時候銀行都願意網開一面唔罰你錢。但如果遲咗供樓，影響就可大可小！筆者最近有個朋友，正正就因為遲咗幾日供樓以致按揭申請被拒…… 申請轉按時，除咗基本個人資料以及入息證明外，亦會要求客人提供最近3個月嘅供款記錄，以證明其還款準時。若最近3個月有遲還記錄，銀行就有機會拒絕你嘅按揭申請。而最近3個月有遲還記錄並非死症，只要重新準時還款3個月就可以再申請轉按申請。 不過要注意，所有貸款帳戶資料均會上載到環聯信貸資料庫（TU），無論係信用卡、私人貸款抑或樓宇按揭等都會紀錄在信貸報告上。而所有欠款、遲還、壞帳等記錄都可以被查閱得到。而現時向銀行或其他財務機構申請貸款，該機構都會查閱客人紀錄，並參考其信貸紀錄而決定是否批出貸款。如果客人係遲嘅慣犯，除咗影響轉按申請，更有機會因為不良嘅還款記錄而影響日後向銀行及財務機構申請貸款。所以大家緊記要準時還款！ 而筆者友人因為按揭還款戶口與出糧戶口不同，所以每個月都要由出糧戶口將錢轉帳到還款戶口，今次正正因為工作太忙而忘記轉帳致遲還令到轉按申請被拒。更慘嘅係友人本想趁樓價於高位時轉按套現，而現時預期未來短時間內樓價應會繼續下調，三個月後再申請時可能樓價應已下跌而影響友人原來嘅財務計劃。 若要避免發生與筆者友人一樣嘅悲劇，其實大家可向出糧戶口嘅銀行申請行常指示，每個月出糧時就自動轉帳到按揭還款戶口作供樓之用，咁就可以避免因各種原因而遲供樓啦。