按揭應該借到盡定係借少啲？

買樓做按揭都有分為所謂「進取型」同「穩陣型」，一般人會覺得按揭借到盡就係「進取型」，可以借到多啲但唔借就叫做「穩陣型」。咁到底按揭應該借到盡抑或借少啲？借盡係咪就代表進取而借少啲係咪就等於保守？ 筆者角度正正相反，筆者認為借到盡嘅比較穩陣，而借少啲嘅反而風險較高！到底此話何解？ 現金為王 相信大家都聽過「Cash is King」現金為王呢句說話，應用係證券市場即係減少持有股票、基金、債券等投資物，轉而持有更多現金。而應用係按揭市場，筆者認為應該有幾多幾多，千祈唔好因為自己有能力比多啲首期而選擇借少啲。特別係當市場不明朗時，持有更多現金會令你有更多選擇。一般情況只要客人能夠準時還款，即使樓價下跌銀行亦不會貿然Call Loan。 存款掛鈎按揭戶口(Mortgage-Link) 筆者叫大家借到盡，可能有朋友會擔心借多咗嘅資金亦需要支付利息令利息成本增加。實際上現時絕大部分銀行都為客人提供存款掛鈎按揭戶口(Mortgage-Link)。銀行會為存款掛鈎按揭戶口內嘅存款提供相等於按揭利率之利息收入，即變相借多嘅錢並不需要利息，而絕大部分銀行限制客人只能將未償還本金之50%放到存款掛鈎按揭戶口內。 資金成本低 香港按揭市場為大家提供一個資金成本低嘅優勢，現時按揭利率為2.5%左右，除咗可以將借多嘅資金放到存款掛鈎按揭戶口對沖利息開支外，尋找高於2.5%借貸之穩健投資亦不難。借到盡除咗為客人提供更多流動資金，更可以利用低資金成本嘅優勢帶來更多收益！