新按保政策下如何善用夫妻首置身份

2016年11月政府推出樓市辣招，除非獲得豁免，否則住宅物業印花稅劃一為樓價之15%。而「首置」身份買入物業屬可豁免，自此「首置」身份變得極其珍貴，同時間拆名甩名個案大幅增加。而今年新按保政策放寬申請按保之樓價限制，1000萬以下最多可做8成按揭及800萬以下最多做9成按揭。而新按保政策亦牽起另一波拆名甩名潮…… 是次放寬按保為好多中產家庭創造物業「一拆二」嘅機會。舉個例，由夫妻共同持有一個800萬物業，尚餘450萬按揭。放寬按保前，1000萬以下物業最多只能做6成按揭，800萬物業最多只能借480萬，扣去原有450萬按揭，則最多只能從物業當中套現30萬。30萬莫講話做首期，就連拎嚟交印花稅都好勉強！ 不過係放寬按保之後，同一個故事可以有不一樣嘅結果。原先由夫妻共同持有的800萬物業，可以透過甩名將整個業權由一人持有，800萬物業最多可做9成按揭即720萬。720萬扣去原有按揭450萬可套現270萬，再以套現的270萬作為夫妻另一人買入第二個物業的置業預算，相信選擇亦會多好多。 而以上「一拆二」嘅方法亦有注意事項，包括整個過程須涉及業權轉讓，而「甩名」過程實際上係將其中一人嘅業權轉讓予另一人，符合要求。若物業由夫妻其中一人單名持有，而另一個只係擔保人，甩擔保人時並沒有涉及業權轉讓，則未能符合要求。 另外，雖然按保放寬後首期開支大減，但申請人收入要足夠通過供款入息比率或壓力測試之要求。以800萬物業為例，做9成按揭，還款期30年，按息2.5%計算，通過壓力測試之月入要求為$78,048。今時今日可以月入8萬，相信申請人亦非一般普通打工仔。