Your browser does not support JavaScript! In order to see this website, please enable JavaScript!
我們偵測到您的瀏覽器不支持JavaScript!為了可以使用本網站,請開啟JavaScript!
三月 28, 2024 星期四 多雲 25° 81%

政治氣氛唔明朗,好驚樓價大跌可以點做?

 
     
2019/08/19 文博
近日香港社會發生咗好多不愉快事件,筆者亦寄望香港快啲好過來。先撇除政治唔講,近日嘅社會氣氛的確對香港經濟做成一定影響。要知道,一個成熟嘅金融城市能夠吸引外資係當地投資,其中一個極具重要嘅因素就係政治穩定。 相信一眾有樓之人亦擔心若然情況持續落去,樓價大跌就會做成身家大縮水。咁到底有無方法可以協助大家對沖今次事件所做成嘅風險? 如果大家實為大淡友,睇淡樓市,大可以而家就將手上物業放售。係不明朗市況下採取「現金為王」嘅策略。不過香港人經過多次歷史教訓,相信唔會再輕易將手上物業賣出,而當年好多人就係因為賣咗樓,之後後悔莫及,甚至乎有人賣咗樓之後到而家都「上唔返車」。 所以筆者假設大家都唔會將自己嘅物業放售,係呢個大前題下可以做啲咩呢? 其實物業極受香港人歡迎,其中一個主要原因係其變現能力。由於銀行十分歡迎客人以物業作為抵押品而批出按揭貸款,一般不涉及高成數按揭嘅個案,大概一個月時間便完成整個程序,以不動產嚟講變現能力亦算高。 要對沖樓市下行風險,簡單一個方法就可以,就係將物業「按到盡」!此話何解?等筆者同大家分析一下… 假如物業係早幾年買入,相信物業價值應該都有升無跌。 舉個例: 物業早年以500萬買入,現欠按揭250萬,現時物業估值800萬。 若將物業「按到盡」,最多可以480萬,扣除原有按揭250萬,即可轉按套現230萬。 而按多咗嘅230萬,係沒有其他財務安排嘅情況下,可以全數放入銀行提供嘅高息戶口(Mortgage-Link),對沖利息開支。 而將來樓市都不外乎三個情況:1.升 2.跌 3.無升無跌 1. 樓價升 若然樓價上揚,業主們可以繼續享受物業升值而令財富增加,而額外套現嘅現金亦無需利息成本。 2. 樓價跌 如果樓市真係下行,轉按套現已經為大家鎖定過去幾年樓價上升所帶嚟嘅利潤。只要大家準時還款,即使樓價下跌,一般情況銀行亦不會Call Loan。而在市況調整嘅情況,手持現金亦可以作出其他財務上嘅部署。 3. 唔升又唔跌 一句講晒,業主們可以繼續乖乖地準時供樓,借多咗嘅部分繼續留係Mortgage-Link唔使俾利息。 總結而言,即係話「按到盡」實為一種輸打贏要嘅安排!唔按你就笨! 如果大家有留意最近嘅成交,多區物業開始出現減價轉手嘅情況。趁而家銀行估價仲未有大幅度調整,及早安排轉按套現鎖定利潤,為未知嘅後市盡早部署!
(文章內容純屬作家個人意見,並不代表本網頁立場)
贊助