2014-07-28
太陽報
依家樓市由用家主導，市況自然由細價樓領軍，豪宅今年上半年交投表現其實好一般，之不過最近可能受入市骨牌效應帶動，所以部分豪宅區或屋苑成交表現都唔錯。好似中半山區，今年頭六個月，有五個月交投量係單位數，但七月到依家已經錄到約17宗成交，平咗舊年十月份紀錄，按月升超過一倍，六月時只得1宗成交嘅奧運站柏景灣仲誇張，今個月已錄到約7宗成交，勁升六倍。
中半山業主叫價向來硬淨，所以早排市況唔係咁順，業主寧願唔賣，亦唔肯劈價。
中原陳華勝同劉Sir話，近期一手豪宅新盤賣得咁好，唔少豪宅買家都心郁郁入市，遇有心頭好出價都無之前咁手緊，所以成交多番啲。
他續稱，今個月到依家中半山已經錄到約17宗成交，平咗舊年十月份全月紀錄，由於月尾之前分分鐘再錄成交，相信到時成交量有機會創超過一年新高。
貝沙連續兩月雙位數
阿陳又話，今個月嘅成交唔少係一線物業，佔咗4宗做價超過5,000萬元，好似今年未聞成交嘅May Tower，都有個1座低層2室以6,480萬元賣咗，以實用面積約2,218方呎計，實用呎價約2.92萬元。
今年初，曾經試過月錄幾宗成交嘅港島南貝沙灣，呢兩個月都吐氣揚眉，六月份錄到約14宗成交，今個月暫有約11宗，連續兩個月有雙位數成績。
柏景四成客唔睇就買
不過講到勁升，就一定要講吓奧運站柏景灣。美聯譚振聲話，奧運三寶一向以維港灣比較相宜，所以上個月走貨比較多，今個月可能平盤被吸納，推動柏景灣貨源被搶吸，七月至今已錄到約7宗成交，比六月只係得1宗，多咗六倍。
喺缺乏吉盤之下，柏景灣有約三、四成單位買家喺無睇樓就入市，至於做價都幾平穩，好似8座中層C室海景戶，實用面積約848方呎，賣咗約1,350萬元，實用呎價約1.59萬元。
除咗市區豪宅轉旺之外，新界區中價洋房都唔錯，成交集中喺下半個月出現，單係元朗加州系洋房，今個月暫時都有約8宗成交，比上個月全月4宗，多咗一倍。
劉Sir