2014-07-25
太陽報
每逢暑假租市都特別旺，不過目前市場租盤接近乾塘，令到租金愈搶愈高。最近連天水圍居屋月租都衝破萬元大關，天愛苑有一個三房單位，最近以月租高達1.13萬元租出，唔單止高出市值約25%，仲創咗全區居屋月租歷史新高。而私宅都唔弱，屯門瓏門有兩房單位成交月租達1.63萬元，租金貴絕同區兩房單位。
祥益黃肇雯同劉Sir講，最近天愛苑有個A座高層10室三房單位，由內地背景租客以每月約1.13萬元承租，創咗天水圍居屋租金新高。
如果上述獲承租嘅單位，以實用面積約598方呎計，實用呎租約18.9元。佢話，依家天水圍居屋租盤已經所餘無幾，全區只得約20個租盤；三房單位月租叫價要1萬元左右起跳。
瓏門兩房實呎租$34
居屋租金升唔停，私宅租金亦被谷起。市場話，瓏門1座有個高層E室兩房單位，實用面積478方呎，最近以每月1.63萬元租出，貴絕屯門區兩房租金水平，實用呎租去到約34.1元，據聞，依家呢個盤已經無晒兩房租盤，即使三房租盤都唔夠5個。
美聯陳國良話，沙田希爾頓中心B座高層6室，實用面積659/412方呎，由一組內地學生租客以每月1.6萬元租咗，亦創同類租金新高。
泓景臺連天台撲千萬
另一方面，買賣市場亦因為缺盤，所以做價屢創高價。劉Sir八到，長沙灣泓景臺1座有個連天台單位，以952.8萬元賣出，實用呎價14,285元，相信係屋苑呎價新高。
中原周世康表示，香港仔港麗豪園2座中層C室，單位實用面積479方呎，近期以565萬元成交，實用呎價11,795元，創該盤兩房呎價新高。世紀21物業（將軍澳）魏仕良稱，將軍澳浩明苑高層1室，以398萬元沽出，實用呎價8,206元，成交價亦係新高。
此外，投資者都把握機會好價出貨，名采策略姚雲龍話，資深投資者黎汝遠以1,250萬元賣出北角城市花園9座中層D室，揸咗近四年帳面賺約262萬元。
劉Sir