2014-07-14
太陽報
市區重建局嘅觀塘市中心重建計劃第二及三發展區會喺聽日截標，呢個市建局歷來最大型嘅項目邀請咗10家本地財團入標。項目入場費雖然高達80億元，不過，市場認為九龍東潛力優厚，項目不愁出路，睇怕反應唔會太差。好似區內有大型商業發展嘅新地（00016），早排都透露咗會入標競投。
上述觀塘市中心重建計劃之前收到15份意向書，不過市建局最後只係邀請咗其中10家財團入標。當中包括新地、長實（00001）、信置（00083）、恒地（00012）以及新世界（00017）五大發展商等。
其中，在區內擁有大型商業發展創紀之城嘅新地，早前就表明，睇好九龍東重建發展，所以會入標競投。
劉Sir知道，呢個觀塘市中心項目早喺九十年代已經開始構思重建，整個地盤範圍廣達約57萬方呎，係市建局歷來最大型嘅重建項目；此外，觀塘區至今亦一直保持良好嘅發展步伐，再加上近年政府加強發展九龍東，令到區內商業地嘅價值水漲船高。
入場費高 財團或合資
而劉Sir嘅測量師老友都認為項目競投氣氛會唔錯，理想城市張聖典就話，九龍東發展極具潛力，而舊區重建比起新發展區更加穩陣，加上供應有限，呢個大型重建項目不愁出路。不過，項目入場費高，相信除咗新地同埋長實等大型發展商有能力「食得起」之外，其他獲邀財團或者要以合組形式參戰。
所謂「英雄所見略同」，老友高緯環球張翹楚都話，呢個觀塘大型重建項目係兵家必爭之地。其中新地會比較有優勢，因為同隔籬嘅創紀之城會有協同效應，佢相信10家獲邀財團都會積極參與競投。
商業部分須交市建局
劉Sir知道，呢個項目入場費最少要80億元，分紅就唔再沿用按利潤多少嘅模式，而係由發展商自行提出，項目嘅商業部分要交番畀市建局。
換句話講，中標財團只係負責項目嘅住宅部分，以住宅樓面約149.6萬方呎計算，入場每方呎樓面地價就約5,348元。
劉Sir