2014-07-09
太陽報
近排內地旅客訪港無早幾年咁蜂擁，不過對本港商舖市場仍有支持作用，所以業界都幾睇好舖租會有穩定增長。中原（工商舖）嘅老友就覺得舖位供應唔係咁多，租金想跌都難，全年睇升5至8%。仲量聯行就話舖租下半年有5%以內上升空間。好似資深投資者蔡志忠最近買返嚟嘅北角英皇道雙號地下至2樓部分巨舖，就決定打造成潮流廣場收租，似乎都幾睇好舖租前景。
老友中原（工商舖）潘志明同劉Sir講，內地個人遊數量的確係減少咗，但係本港舖位供應有限，所以租金都幾難下跌，核心區舖租會有穩定走勢，估計全年整體舖租有約莫5至8%增長。
舖位買賣大縮六成
不過舖位買賣就無之前咁活躍，該行黃偉基就話，上半年錄約1,139宗舖位成交，涉額156億元，宗數比舊年下半年少咗六成，可見短線投資者絕迹市場，而且部分有實力嘅投資者持貨力強，唔肯減價，所以依家舖位交投膠着，尤其係核心地段吉舖會多啲，因為業主叫價進取。
劉Sir睇見仲量聯行嘅《2014年中期物業市場回顧》，發現佢地都睇好下半年舖租，認為內地旅客訪港增長雖然放緩咗，但係對商舖市場仍有相當支持作用，今年上半年街舖同埋高級購物中心嘅租金就有約莫0.8%及0.9%增長，估計年內仲會有約5%以內嘅溫和升幅。
北角舖變潮流廣場
上半年市場有唔少「劏舖」同「拆場」項目推出，不過部分投資者就睇好舖租回報選擇收租，好似老友資深投資者蔡志忠最近用咗約1.4億元買入嘅北角英皇道亞洲大廈地下至2樓部分巨舖，面積約莫1.5萬方呎，之前由連鎖電器品牌用，佢話要搞好個場，搵多啲好租客進駐，打造成潮流廣場收租，暫時都唔諗拆售。
仲量聯行話，上半年整體甲級寫字樓租金錄約1.3%增長，以中區升約1.9%最多，不過供應較多嘅九龍東租金就輕微回落0.6%。該行龐定勤預期，今年下半年九龍東商廈嘅租金仲會有5%以內嘅跌幅。