2014-07-08
太陽報
人人搶入市，搞到最近各類型物業樓價都升咗唔少，即使舊年樓價升幅已經跑贏大市嘅二手居屋，最近都仍然錄到創新高價個案。好似東涌居屋裕東苑，劉Sir尋日喺市場聽到呢個屋苑呎價同售價都雙雙破頂。其中有個D座中層單位成交實用呎價高達7,344元，破咗屋苑紀錄；而另一個E座中層單位就以約412萬元自由市場價賣出，估計係屋苑做價最貴單位。
私樓樓價狂升，連居屋樓價都唔輸蝕，聽東涌嘅代理老友講，裕東苑D座中層15室，建築/實用面積約576/433方呎，啱啱喺自由市場以約318萬元賣出，建築/實用呎價約5,521/7,344元，實用呎價創咗屋苑新高。
公屋長安邨賣到300萬
至於另一個E座中層8室，實用面積約646方呎，自由市價賣約412萬元，料售價屬屋苑新高指標，實用呎價約6,378元。
其實高價個案近期好似遍地開花咁，已經喺各區出現。將軍澳樓價超過500萬元居屋成交一向唔多。聽市場講，欣明苑C座高層2室，建築/實用面積約827/645方呎，最近以498萬元自由市場價賣出，相信係屋苑新高，建築/實用呎價約6,022/7,721元。
現時除咗同區煜明苑之外，區內罕聞居屋做價可以去到500萬元以上。至於公屋市況都唔弱，消息話，青衣長安邨6座有個高層戶，最近喺自由市場以300萬元賣出，料創屋苑新高。
利東邨銀主叫價265萬
講開公、居屋，近期銀主盤市場都有幾個呢類單位推出，其中一個係比較少有嘅港島公屋銀主盤，個單位係鴨脷洲利東邨東平樓高層11室，建築/實用面積約500/381方呎，銀主意向價265萬元，建築/實用呎價約5,300/6,955元。
另一個比較特別係將軍澳夾屋叠翠軒，屋苑4座高層G室，單位建築/實用面積約827/660方呎，現意向價550萬元，建築/實用呎價約6,651/8,333元。