2014-07-03
太陽報
工廈買賣氣氛未見好轉，買家若有誠意，業主都肯喺簽臨約嗰陣，再減價讓步。近排九龍東幾個區域同長沙灣都聽到有成交價，罕有咁比銀行估值低嘅個案，低出幅度由近3至13%不等。其中，紅磡凱旋工商中心1期低層戶，早排以約2,800萬元賣咗，比起銀行估值低約400萬元，低出幅度約12.5%。
雙倍印花稅措施下，整體物業買賣成交勁少。劉Sir聽個經紀行老友呻，上個月東九龍工廈買賣只約53宗；而長沙灣區買賣僅約19宗。
東九龍交投慘過淡季
佢話，當中東九龍嘅交投，比二月份農曆新年期間淡季更少。市況麻麻，有興趣買家唔多，業主唔想錯失出貨機會，都肯接受買家「突然」還價，所以近排市場有唔少工廈成交價都低過銀行原先估值。
「起動九龍東」唔能夠為區內工廈做價沖起，聽講紅磡凱旋工商中心1期低層戶，面積約8,000方呎，今年初銀行估值大約3,200萬元。
不過，市場氣氛轉差，個準買家入市信心開始動搖，業主擔心買家「縮沙」，大家再議價之後，結果決定減價至約2,800萬元賣出，呎價約3,500元，比銀行之前估值低約400萬元，低出約12.5%。
九龍灣美羅中心2期有個中層戶，面積約1,100方呎，銀行月前估值約750萬元，原來幢大廈差唔多樓層有唔少放盤，買家唔憂無盤，伺機還價。
上述單位嘅業主最終願意以約720萬元出售，呎價約6,545元，比銀行估值低約30萬元，低出幅度約4%。
長沙灣盤低估值3%沽
長沙灣有新建工廈挾送贈印花稅等優惠促銷奏效，區內工廈二手做價點會冇壓力。有代理話，長城工廠大廈有個高層單位，面積約2,200方呎，月前銀行估值約1,000萬元，準買家認為超出預算。
經磋商後，業主願意以約970萬元賣，呎價約4,410元，比銀行原本估值低約30萬元或約3%。
美聯工商助理營業董事羅志明認為，依家銀行對工廈物業按揭成數只係得4成，部分銀行審批態度仲愈嚟愈嚴謹，喺目前市況下，買賣成交少，唔少業主怕成交泡湯，所以都肯喺簽約買賣時，增加議價空間，希望成功賣出單位。
劉Sir