2014-07-02
太陽報
本港零售總額大跌，反映近年內地反貪腐，影響到內地個人遊消費意欲。加上近排政府又話收緊個人遊配額，相信下半年零售業都無運行。有資深舖位投資者及代理都同劉Sir講，睇淡下半年舖市走勢，預計商舖租售價都會跌5至10%。投資者鄭躬洪話個舖要由11萬元，減到8萬元先租得出，減幅27%。
政府統計處最近公布四月份零售總額臨時數據，僅錄得388億元，按年下跌9.8%。
鄭躬洪：租售齊見頂
其中鐘錶、珠寶首飾及名貴禮品等奢侈品，更按年大跌39.9%。零售市道持續收縮，有業界人士早前更下調今年全年零售增長預測，由最高12%下調至5%。
資深舖位投資者鄭躬洪話，近排個舖市唔多掂，已經見頂回落，預計下半年舖價跌5至10%，租金則至少跌一成。
佢仲話依家市場係租客主導，佢個皇后大道西舖，要叫價減27%先租得出，由約11萬減至約8萬元，而且租客仲要求裝修吓個舖位。
黎永滔三物業仍搵客
另一位資深舖位投資者黎永滔一樣睇淡舖市表現，佢話內地反貪腐，少咗內地人來港買貴嘢，奢侈品零售市場大受影響。依家舖市已經靜咗好多，預計今年下半年舖位租售價齊跌5至10%。
佢話現時手頭上至少有三個物業搵緊租客，包括銅鑼灣羅素街59號一個700方呎舖位，同霎東街2號一個200方呎細單邊舖位，意向租金分別約300萬元及8萬元。
另外，佢喺旺角亞皆老街67至69號個2,000方呎舖，意向租金約350萬元。佢又話，該批舖位罕有，位置亦好，佢會企硬唔減價。
其實早前已經有代理講過，今年「吉舖」增加，主要係因為零售市道疲弱，租客續租態度唔再積極。但部分業主唔肯減租，寧願暫時丟空舖位。如果情況持續，睇怕未來舖市依然會好淡靜。
劉Sir