2014-01-16
太陽報
近排新建工商物業同商場「劏舖」送辣招稅等優惠吸客，結果銷情大旺。火炭同葵涌有二手工廈業主見客源被搶，除咗減價，亦罕有加佣、送雙倍印花稅同高租金回報招徠。火炭華樂工業中心就有單位，半年間已劈價共25萬元，更將代理佣金加到3%。另荃灣嘉力工業中心有單位售後租回兩年，加埋首年租金回報率達6厘招徠。
有代理同劉Sir講，雖然依家二手工廈叫價好吸引，但無優惠好難吸引買家。
所以火炭山尾街華樂工業中心有個中層戶，面積約900方呎，單位放售已約半年，期間累積減價二十五萬元，依家嗌緊約260萬元，呎價約2,890元，雖較市價低約5%，但係都無人吼。
業主覺得再減都未必有用，於是決定大幅加佣至3%，直接鼓勵代理搵客。
葵涌打磚坪街和豐工業中心有個中層戶業主，舊年第四季開價約230萬元放售，今年初減價約20萬元，意向價降至210萬元，以面積約700方呎計，呎價約3,000元，已貼近市價水平，但仍未賣出。
葵涌華基贈稅自救
上述單位業主決定唔再減價，而係加佣至約3%，若以意向價售，應付佣金只約6.3萬元，比起劈價十萬元，成本低好多。
舊年商用物業買賣勁減，主要係受雙倍印花稅辣招影響，有業主就見招拆招。聽講打磚坪街華基工業大廈1座有個低層戶，面積約2,500方呎，業主話唔減價賣，堅持嗌約450萬元放售，呎價約1,800元。
不過，如果買家以意向價買入單位，業主就會幫買家畀埋雙倍印花稅款，涉及金額約27萬元。
荃灣嘉力保證6厘
喺低息環境下，高租金回報物業點都有捧場客。持有荃灣白田壩街嘉力工業中心兩單位自用嘅業主，舊年底開始放售A座中層戶，面積約700方呎，叫價約260萬元，呎價約3,710元。
若果買家自用當然交吉賣，業主都可以售後租回兩年，租金回報率高達6厘，比起工廈一般租金回報率高出2厘。
劉Sir