2014-06-27
太陽報
今個月多個豪宅新盤蜂擁而出，搞到唔少區域嘅二手豪宅市場都靜晒，但係有啲低水屋苑就仍然成功突圍。好似做開港島南貝沙灣嘅代理老友同劉Sir講，今個月到依家個盤已經有12宗成交，按月多咗50%。一個持有唔少港島豪宅嘅翁姓資深投資者，繼四月時沽咗個6期8A座單位之後，啱啱又以約1,650萬元賣出咗1期1座中層單位，兩伙共套現約6,110萬元。
代理老友話，翁姓投資者啱啱賣出咗嘅貝沙灣1期1座中層A室，單位建築/實用面積約1,016/844方呎，連租約成交價約1,650萬元，建築/實用呎價約1.62萬/1.96萬元，揸咗約十一年，帳面賺逾1,100萬元。
中原林少禮同劉Sir講，港島南貝沙灣係今個月已經錄到12宗成交個案，比上月同期就升咗50%。
最近6期8B座中層B室，建築/實用面積1,878/1,352方呎，業主原本叫價3,350萬元，傾完價之後，以2,950萬元賣出，建築/實用呎價約1.54萬/2.18萬元，原業主揸咗五年幾帳面賺約940.5萬元。
山頂南區僅售五伙
講開今個月，西區寶翠園表現唔錯，五月份零成交，今個月突然有4宗，主要都係個盤依家仲有唔少單位實用呎價只係萬六、七蚊，所以有買家追落後。
美聯方富義話，今個月多咗豪宅新盤開賣，而且又係考試月，所以山頂、南區交投相對靜啲，今個月到依家約有5宗成交，上個月全月就有9宗，如果嚟緊呢幾日都冇新成交，將會同今年一月以5宗成交，並列今年單月新低。
豪宅租務今年最靜
另外，西半山今個月都係以千零、兩千萬元嘅成交個案為主。
中原鄭煜表示，該區瓊峰臺中高層C室，實用面積1,208方呎，業主原本叫價2,300萬元，最終以2,080萬元市價賣出，實用呎價約1.72萬元，物業二十四年間升值5.75倍。
另一方面，利嘉閣有份報告話，五月份35個指標豪宅只係錄得162宗租務成交，係今年以來最少，加權平均租金指數報121.57點，就升咗1.1%。
劉Sir