2014-06-19
太陽報
政府多年前推出工廈活化措施，希望透過有關計劃，可更加善用空置率高企嘅工廈單位。但係活化工廈措施自二○一○年起實施，只係批咗共96宗，未達原先預期，政府有意煞停。有地產代理行預計，下半年全港工廈售價及租金會下跌，其中售價跌幅高達10%。
業界睇淡 價恐挫10%
政府擬於一六年取消活化工廈政策，香港置業工商舖董事陳偉志對劉Sir講，話會睇淡下半年全港工廈租售價。其中售價相信會跌約5至10%，租金跌5%。
佢仲話，政府其實唔應該因為申請宗數唔夠而全面取消活化政策，陳董就建議將活化期限延長至一七年底，並要求放寬同修改現行條例。
資料顯示，自活化工廈政策實施起，已累積收到約126宗申請，批出約96宗，主要申請為綜合用途及辦公室用途，兩項用途佔整體申請比例約41%及29%。
根據差餉物業估價署資料，截至去年底，以荃灣區工廈空置率最高達9.2%，區內有約231萬多呎工廈樓面空置。
另外，鵬里資產項目銷售經理楊棣嘉話，現時屯門區工廈呎價低水，大幅落後東九龍地區，空置率僅1%，該區有望成為物流業重點發展中心。相信下半年該區工廈售價上升10至15%，租金上升10%。
利嘉閣工商舖高級區域董事朱亮恒話，截到本月十五日，上半年全港暫錄1,058宗工廈買賣登記，成交總值約86億元，預計上半年工廈買賣登記宗數最終可達1,192宗，平均每個月平均200宗，屬極低水平。
佢預計上半年摸貨成交佔大市整體成交比例相信會進一步下滑至1.1%，創記錄新低，近乎絕跡。
觀塘商廈趁勢加價
本月仍錄零星工廈成交，根據土地註冊處資料，觀塘大業街華凱大廈全幢，成功以1.91億元售出。中原工商部陳錦倫話，同區偉業街天順工業大廈高層，成功以近968萬元售出。據悉，荃灣沙咀道中央紗廠獲買家主動以近10億元洽購。
日前觀塘商廈One Bay East東座全幢售出，做價較之前高兩成，有發展商趁勢將旗下九龍灣商廈加價。
億京發展嘅常悅道商廈恩浩國際中心，其中58個單位，加價1.3至1.7%，售價由1,493.9萬至4,824.6萬元。