2014-06-17
太陽報
隨着時代轉變，本港對工業需求愈來愈少，所以政府早年就研究釋放多個工業區用地。其中沙田小瀝源工業區面積廣達約7.5公頃，而區內業主亦陸續「起動」。好似新地（00016）喺小瀝源嘅酒店項目，最近以超過3.5億元完成埋補地價，每方呎約1,000元鬆啲，相信區內其他工業地嚟緊亦會陸續釋放出嚟。
劉Sir知道，地政總署尋日公布咗最新完成嘅補地價個案。其中上述新地嘅沙田小瀝源酒店項目，以約3.5189億元完成補地價。
提供超過700房間
根據項目早排城規會批出嘅方案，總樓面約34.4萬方呎，會提供唔超過700間客房，而計落平均每方呎補價金額就大約1,000元多啲。區內同類個案要數到南豐喺二○○七年完成補地價嘅香港沙田萬怡酒店，當時補價金額約4.39億元，每方呎補價約1,200多元，即新地今次每呎補價，比七年前更平。
其實政府早年就本港工業用地進行研究，範圍入面嘅7個工業區總面積接近30公頃，當中小瀝源工業區佔約7.5公頃。
黃竹坑道項目獲批
隨住今次新地嘅酒店項目完成補地價。相信嚟緊仲會有其他研究範圍入面嘅項目都係慢慢釋放。
另方面，中華汽車（00026）同埋太古地產（01972）嘅黃竹坑道商廈項目，亦以10.6973億元完成補地價。至於同區嘉華國際（00173）嘅黃竹坑道34號商廈發展，補地價金額就大約3,093萬元。
政府研究釋放工業用地，講到尾都係想增加多啲住宅供應。劉Sir知道，嚟緊星期五又有住宅地截標，今次截標嘅馬鞍山馬錦街限量地，受到近排大埔白石角住宅地低價批出影響，搞到估值愈估愈低。
好似韋堅信測量師行林晉超就估計地皮市值約6億元，每方呎樓面地價約2,997元，係市場下限估價。至於美聯同中原都先後調減咗地皮估值約5%至11.1%，估值約7.2億、及8至9億元不等。