2014-06-13
太陽報
新盤成交最近明顯增多，地產代理監管局（下稱地監局）巡查發現嘅一手違規個案都同步多咗。劉Sir知道單係今年頭五個月就有8宗同類個案，比起舊年同期嘅「零」宗增多，其中有4宗係涉及新盤墊支嘅投訴，連同1宗局方主動跟進嘅個案，全部5宗個案都經已立案
地監局新任行政總裁韓婉萍昨日同一班記者老友傾計同講吓工作進度，佢話，今年頭五個月進行巡查就發現有30宗違規個案，比舊年同期嘅22宗多。
當中有8宗係涉及新盤嘅個案，同舊年同期嘅「零」宗相比，確係多咗，通常係涉及秩序、截車、貸款及回贈嘅問題。不過，講到代理違規情況係唔係惡化咗，佢就認為，只係短短幾個月好難下定論。
如果以整體計，其實今年頭五個月收到嘅投訴個案只有158宗，相比舊年同期嘅209宗，減少咗24%。但係可能因於新盤旺咗，所以涉及新盤嘅投訴就按年急升50%，去到21宗。
四宗涉墊支 5項立案
其中4宗係代理為新盤提供墊支，連同1宗局方主動跟進嘅同類個案，5宗個案全部都已經立案，有1宗更已經排期等候聆訊。
劉Sir數數手指，原來韓婉萍加入地監局已經有八年，原本一直出任服務總監，先後跟隨過三位行政總裁，其中兩次仲臨危受命，喺物色新任行政總裁期間，擔任署理行政總裁。今次坐正，她認為，從前喺三位行政總裁中學習咗唔少行政同管理嘅工作經驗。
韓婉萍個人係律師出身，曾經負責管理一間約100人的律師樓，同地監局現時規模差不多，所以有信心能帶領團隊，希望工作可以穩中求進。
未來代理人數料續減
講到依家地產代理業界問題，她認為，最急切係要改善業界服務態度問題，令業界做到以誠為先，以信為本。
此外，雖然代理人數近一年少咗近1,800人，預期未來人數會續減，但局方唔會考慮加牌費，希望大家互慳去解決資源問題。
劉Sir