2014-06-12
太陽報
新盤市場嚟緊下半年百花齊放，勢掀起一場新盤大混戰。好似新地（00016）尋日就公布咗荃灣西海瀧珀4座洋房嘅銷售安排，嚟緊星期日會正式銷售。下個月就輪到山頂Twelve Peaks公布價單，唔排除以招標形式出售。部分發展商就認為下半年多新盤推出唔會有壓力，反而可以帶旺氣氛，又可以畀買家有更多選擇。
劉Sir昨日出席中原將軍澳規劃及資訊中心嘅開幕禮，撞到一大班發展商老友，原來佢哋都密鑼緊鼓咁部署下半年推出新盤項目。
長實兩盤快上樓書
新地雷霆話，集團繼續月月有盤推，好似海瀧珀尋日公布銷售安排，嚟緊周日發售；下個月計劃推出Twelve Peaks，或者會用招標形式都未定；跟住八月就計劃推售將軍澳天晉III。
將軍澳未來有龐大供應，除咗上述天晉III，長實地產投資黃思聰就話，將軍澳日出康城3期緻藍天同大埔嵐山兩個項目，示範單位同樓書都準備就緒。
嘉華國際（00173）黎漢群話，集團嘅將軍澳66D1區項目已申請預售文件，會提供380個單位，一房至四房間隔都有，料可以喺後年落成；東半山肇輝臺項就會喺最快下個星期公布17伙價單，當中3個會用嚟放租，月租16.5至19.5萬元。
劉Sir老友會德豐地產黃光耀就話，西南九龍GRAND AUSTIN近日公布咗樓書，呢兩日開始接觸代理，嚟緊短期內會開放示範單位畀公眾參觀，但係仲要同合作伙伴商量，所以未有推出日期住，不過，就有加價空間。雖然下半年市場有咁多新盤推出，但佢覺得係好事，可以推動氣氛同交投咁話。
華懋義德道下季推
至於華懋集團吳崇武就對上半年集團售樓表現唔係咁滿意，但今年內就會有3個項目推出。佢話，九龍塘義德道項目暫時仲未取得滿意紙，但希望可以趕到下季推；而屯門青發里同埋九龍城衙前圍道項目，都會係今年內推出。
但亦有發展商今年銷售提早達標，九建（00034）楊聰永話，旺角MacPherson Residence至今賣咗50個單位，套現4億元，首階段銷售已經達標；而項目嘅複式單位就暫未有推售部署。對於下半年有大批新盤供應，佢就覺得樓盤各有特色，唔怕會有競爭，仲可以畀買家更多選擇。
劉Sir