2014-06-10
太陽報
買家趁樓市氣氛轉好，近期猛追落後，好似港島南貝沙灣，一般每月只係得幾宗成交。不過，今個月表現大勇，劉Sir聽區內代理老友講，暫時已經有約7宗成交，逼近上個月全月約8宗水平。
貝沙灣早排由於有唔少業主叫價仍然強硬，所以搞到買賣雙方膠着，但近兩、三個月見其他二手豪宅都有唔少業主願意減價，所以叫價都貼番市場，刺激屋苑交投多咗。
據了解，貝沙灣四月份錄到約13宗成交，上個月都有約8宗，嚟到今個月表現更大勇，暫時已經有約7宗。
擎天港景峯錄承接
該屋苑新近有一個2期3座高層A室，建築/實用面積約1,688/1,366方呎，以2,720萬元賣出，建築/實用呎價約1.61萬/1.99萬元；而同期1座高層B室同2座低層B室，分別以約1,680萬同2,430萬元賣咗。
另一方面，九龍站及附近一帶主要屋苑今個月表現都唔錯，今個月到依家都有約5宗成交。
除咗擎天半島同尖沙咀港景峯各錄兩宗成交之外，啱啱漾日居有個2座低層A室，建築/實用面積約1,188/941方呎，由買家以約1,500萬元買入，建築/實用呎價約1.26萬/1.59萬元。
翠巒閣開齋兼破頂
市場頻頻有二線豪宅做價破頂，世紀21北山嚴智贇話，兩年未聞成交嘅天后翠巒閣，最近有個中層A室，建築/實用面積1,890/1,445方呎，業主放盤一年，終於以2,218萬元賣出，建築/實用呎價約1.13萬/1.47萬元，屬屋苑新高。
中原余志偉表示，火炭駿景園今個月暫錄約4宗成交，其中，該屋苑一個5座中層F室以1,650萬元易手，實用呎價超過1.2萬元，亦屬好價。原業主揸咗個單位約莫七年，依家帳面賺約725萬元。